external image rubencarrasco.jpgichwa shimika, shuktak shimikunashina willachikunata, wiñay kawsaytapash charinmi.
Kay ñukanchik llaktapi, ñawpa pachaka kichwa shimitaka mana rimakkunachu kashka, ashtawanka shuktak rimaykunami tiyak kashka, inpaya, kitu, panzaleo, puruwa, kañari, wankavilka, manta, shwar, shuktak shimikunapashmi tiyashka.

Ñawpa rantik-katuk inka runakunaka kay llaktaman shamushkakuna, shinami kichwa shimitaka paykuna yachachishkakuna. Tupak Yupanki kay llaktakunaman chayashpaka paypak shimita uyashpaka mancharishkami. Shinapash paykunapak yachayta, sumak rimay yachayta, shuktakunatapash kay llakta runakunaka hapishkakunallami.

Chaymanta kunankama Chile llaktapi, Bolivia llaktapi, Argentina llaktapi, Perú llaktapi, Ecuador llaktapi, Colombia mamallaktapipashmi kichwa shimitaka rimashpa, allichishpa, mirachishpapash katikunkuna.

Shinami Ecuador mamallaktapipash punasuyupi, antisuyupipash kichwa shimita rimashpa katikunchirak.

Kay shimika, ñawpa pachaka mana kayshina killkataka killkankapak charirkachu.
Yuyaykunataka kipupimi churakkuna kashka.
Chayrak shuk waranka iskun patsak pusak chunka watallapimi, tukuy llakta tantarishpa kichwa shimipak killkayta akllarkakuna. Chay pachamanta kay rimayta sinchiyachishpa katinkapakka, ñami pankakunata shuktak mutsurikunatapash yachachinkapak rurakunchik.

Kichwa shimi ama chinkarichunka, sumak rimay yachayta, shimiyuk pankata rurashpa, sumak yachaykunata wiñachishpa, rikuchishpa, rimachishpa uyachishpapashmi katina kanchik.