external image images?q=tbn:ANd9GcRZ4ehtI9EV7ADng30RLN80GRV4Z16I9qFUUl29b3swBrDwSfn-jQjIpb-1Ñawpaka minkayta rurashpa wasichik karyanchik, kutin lani nishpami wasichinata yachaktaka rimak kashkanchik. Kay lanimi minkayta ruraychik nishpa mañan karyan, chaypakka shuk mayoral-pushakta shutichik karyanchik. Kay pushakmi kaspikunata llakllankapak nishpa wasin wasin minkashpa purik karyan, shinallatak wasichipika wakra uma yurakunata, ukshakunata tantachishpa yanapan karyanchik. Ñawpakunaka mana anta kaspikunawan wasichik kashkanchikchu.

Sukuskunawan, tsawar chillpikunawan, ukshakunawan, sumakta urku piti nishkakunatapash rurashpa wasichik kashkanchik.

Wasichishpalla kushnichinami, chaypakka wasichishka puchu hupakunata tantachishpa rupachinchik wasi ukupi, kay ninapi sarakunata, muruchukunata, purutukunata kamchanchik, kayta kutashpa hawaman shitanchik atukllawa nishpa kaparishpa, kayta chay wasipi ama kaspi mikuk kurukuna tiyarichun shinak kashkanchik.
Kashna kushnichinakushpaka wasiyuktaka waskawan wiksa urapi watashpa warkuna, kutin chaykamanka ishkaypurakunaka ukshawan killparishpa atuk chupa, atuk rinri shinata ukshawan rurarishpa atuk nishpa maymantapash maskashpa kawsak llamata apamunkapak rina, kayshina llamata tarishpaka wasiyukman kuna, chayka llamayuk rikurishpa tapukpilla kutichina, kutin pipash mana chay llamaka ñukapakmi nishpa tapunkapak shamukpika wañuchishpa mikunallami karyan.